Размер шрифта Цветовая схема Изображения Обычная версия

М.Н. Жирков төрөөбүтэ 125 –сылыгар аналлаах «Төрөөбүт дойду туһунан ырыа» Бүлүүтээҕи народнай хор ырыа дьоро киэһэтэ.

Дата: 02.02.2017, раздел: Администрации

Ытык Бүлүүм сиригэр,

Үөскээн-төрөөн ааспыт,

Саха бастыҥ Саарына,

Музыка алыптаах дорҕоонун

Айан-тутан чочуйбут,

Улуу киһибит Марк Жирков

Албан аата үйэлэртэн үйэлэргэ

Ахтылла, ааттана туруохтун!

 

    «Бүлүү улууһа (оройуона)» муниципальнай оройуон баһылыга, Сергей Николаевич Винокуров  тохсунньу ый 16 күнүнээҕи төрдүс нүөмэрдээх дьаһалынан 2017 сыл - Бүлүүбүт улууһугар Саха бастакы профессиональнай композитора, саха профессиональнай музыкальнай культуратын төрүттээччитэ, РСФСР уонна Саха АССР искусстволарын үтүөлээх деятелэ, ССРС композитордарын Союһун чилиэнэ Марк Николаевич Жирков сылынан бигэргэтилиннэ. Композитор аатын үйэтитиигэ, айар уонна духовнай нэһилиэстибэтин тарҕатыыга эппиэтинэстээх сыл үүннэ. Марк  Жирков сылыгар аналлаах бастакы дьоһуннаах тэрээһин «Алгыс» СК тохсунньу ый 28 күнүгэр ыытылынна.  «Төрөөбүт дойду туһунан ырыа» ырыа дьоро киэһэтин Бүлүүтээҕи народнай хор, салайааччы Саха Республикатын культуратын туйгуна Ольга Корякина бэлэх ууннулар. Бу кэнсиэркэ Марк Жирков араас кэмнэргэ суруйан хаалларбыт айымньылара ылланнылар -  Платон Ойуунускай тылларыгар, Марк Жирков музыкатыгар «Ньургун Боотур» операттан, Алексей Тимофеев тылларыгар, Марк Жирков музыкатыгар «Төрөөбүт дойду туһунан ырыа», Николай Туобулаахап тылларыгар, Марк Жирков музыкатыгар «Куоттарыы»,Илья Чаҕыл5ан тылларыгар, Марк Жирков музыкатыгар «Дьокуускай үрдүнэн», Ефим Михеев тылларыгар, музыкатыгар, Ольга Корякина хорга тупсаран оҥоруутугар «Кэрэ Бүлүү», Вера Нанова тылларыгар, Елена Олбутцева мелодиятыгар, Ольга Корякина хорга тупсаран оҥоруутугар «Айан ырыата», Русская народная песня «Во кузнице», Тумус Мэхээлэ тылларыгар, Мирослав Егоров мелодиятыгар, Елизавета Попова хорга тупсаран оцоруутугар  «Оһуор ойуу», Мария Захарова тылларыгар, Иван Туласынов мелодиятыгар «Сайда тур, Бүлүүм куората».

    Маны таһынан кэнсиэркэ кыттыыны ыллылар үһүс республикатааҕы «Үрүҥ түүн долгунугар» ырыа күрэҕин  Гран-при кыайыылааҕа «Ай-ыллаа» вокальнай ансамбль, салайааччы Саха Республикатын культуратын туйгуна Ольга Корякина, Тыымпытааҕы «Дьүрүскэн» эр дьон вокальнай ансаамбыла, салайааччы Саха Республикатын культуратын туйгуна Иван Константинов, СР культуратын туйгуна Августина Семенова, Афанасий Каратаев, Владислав Егоров, Людмила Тобохова, Иннокентий Николаев, Анастасия Николаева, Платон Еремеев.

    Ырыа киэҥ түһүлгэтигэр Саха Республикатын культуратын үтүөлээх үлэһитэ, ССРС культуратын туйгуна, Өрөспүүбүлүкэтээҕи культура уонна искусство колледжын уһуйааччыта Елизавета Степановна Попова ыалдьыттаата. Кини икки күн устата вокальнай ансаамбыллар, хор, музыкальнай оскуола, тыа сирин кулуубун музыкальнай салайааччыларыгар мастер-класс ыытта.

    Бу кэнсиэркэ дирижер быһыытынан холонууларын оҥордо өрөспүүбүлүкэтээҕи культура уонна искусство колледжын хоровой дирижирование үһүс курсун устудьуона Лазарь Гуляев.

    Кэнсиэр түмүгэр, 2016 сыл муус устар 30 күнүгэр, бу үрдүк сыанаҕа Дьокуускайтан кэлбит анал хамыыһыйа иннигэр, Бүлүүтээҕи народнай хор  народнай аатын эрэллээхтик көмүскээбитэ, үрдүк аатын чиэстээхтик итэҕэппитэ. Үөрүүлээх быһыыга-майгыга  хор кыттыылаахтарыгар туоһу суруктары туттарда Ольга Николаевна Корякина.

    Ырыа дьоро киэһэтин иилээн-саҕалаан ыытта Саха Республикатын культуратын туйгуна Кристина Буслаева.

 



Источник: Иһитиннэриини оҥордо: Кристина Буслаева. Хаартыскаҕа түһэрдэ: Дыгын Леонтьев. , просмотров: 488